'A passiona mia erano 'e rrose…

Poesia di Antonio de Curtis (Totò)

'A passiona mia erano 'e rrose,
sultanto 'e rrose rosse.
Stu sciore m'era amico…
stu sciore me diceva tanti ccose,
ma nun m'ha ditto maje 
ca steve n'atu sciore comm'a tte.
Forse pe ggelusia:
penzanne ca vedennete
i' mme scurdavo d'essa,
mm'annammuravo 'e te.
E comme infatti è overo, accussì è stato:
appena t'aggio vista, me songo 'nnammurato! 
E mmò pe tutt' 'a vita,
'nfilato int' all'occhiello d' 'a giacchetta
porto sempe cu mme… na margarita!