Parole d'autore

'A vita di Eduardo de Filippo

Poesia "'A vita" di Eduardo de Filippo

Tags: Acqua
Io songo nat' 'o millenoviciento
e tengo n'anno.
Tu sì d' 'o sittantotto
e n'anno tiene.
Chillo che dice: So' arrivato a ciento!
tene n'anno pur'isso.
 
'O calannario nun 'o date retta.
'O calannario è n'atu scucciatore,
ca vuluntariamente
nce 'accattammo
nuje stesse
e nce' 'o piazzammo
vicin' 'o muro
religiosamente.
 
'A vita dura n'anno.
Tutto 'o ssupierchio e' na supirchiaria.
o, cumme fosse, inutile...
Dicimmo a lengua nosta:
E' p'ingiaria!

Tu, quanno nasce, 
allora e' primmavera.
E tutt' 'o vverde nuovo
'e chelli ffoglie nove
e' na speranza! 

E' tutta na speranz' 'e vita allera.
Vide tanta faccell' 'e criature
ch' 'e scuffie culurate:
so' tutt' 'e ccriaturelle nate morte,
ca tenen' 'o permesso,
na vota all'anno,
'e s'affaccia' p' 'o munno...
E teneno diritto a 'o primmo sole:
so' e' primme viole!	Po' schiòppene garuofene schiavune
e giesummin' 'e Spagna.
'A miez' a mille sciure,
ca so' 'e mille sciure,
ca so' 'e mille culure,

ru sciglie 'a margarita,
ca t'add'accumpagna'
pe' tutta 'a vita.
E; comme ch'e' nu sciore
busciardo e traditore,
te da' 'o primmo delore...
te dice: No!

Te scite na matina e 'o sole coce.
Coce pecche' e' ll'esta'.
Te scite e durmarisse n'atu ppoco,
ma dint' 'o lietto nun ce se po' sta.
Nfra veglia e suonno,
ll'uocchie mieze nchiuse,
stienne na mana
e cuoglie na cerasa.

'A sera, 'o ppoco 'e frisco
e nun t'adduorme... pecché nun puo' durmi'.
Pienze che vene autunno,
e tu ce pienze
pecche', po' doppo, vierno adda veni'.
'E penziere so' assaie,
t'addubbechie.
Sient' 'a voce 'o puntone:
Chin' 'e fuoco!
Ma par' 'o boia ca taglia
e quanno taglia, sott' 'a curtella,
schioppa nu mellone.